Home Wararka Maanta Golaha ammaanka oo ciidamada Amisom waqtiga u kordhiyay

Golaha ammaanka oo ciidamada Amisom waqtiga u kordhiyay

Golaha ammaanka ee Qaramada Midoobey ayaa muddo kordhin u sameeyay Hawlgalka Midowga Afrika ee ka socda Soomaaliya.

Warbixin uu soo saaray Golaha ayaa lagu sheegay in 30-ka October ee soo socota tirada Ciidanka labisan ee Amisom ka jooga Soomaaliya ay noqdaan 20,626 oo Askari, halka ay hadda ka yihiin 22,126 oo Askari.

Waxaa lagu sheegay in muddada dhimista Askarta Millatariga ah ay bar bar socoto ku beddelidda Askar Boolis ah oo gaaraya 1,040 Askari oo Booliska Amisom ah.

Waxaana Booliska loo qaybin doonaa Shan Unug oo ah Boolis xirfadyahanno ah, kuwaas oo ka qaybqaadanaya dhismaha iyo tababarka Booliska Soomaaliya.

Qorshaha hawlgalka Amisom ee Soomaaliya ayaa lagu sheegay in uu yahay in 70% laga dhigo mid rayid ah, iyada oo la dhisayo Ciidan Soomaali ah oo gaaraya  10,900, kuwaas oo xaqiijinaya amniga dalka iyaga oo kaashanaya Booliska Amisom.

Amisom waxaa fursad loo siiyay in illaa dhamaadka Bisha July ee soo socota ay Ciidamo u diri karaan Soomaaliya kaddibna ay billaabaneyso ku beddelidda  Booliska.

Ciidamada Amisom ayaa hadda waxa ay ka kala socdaan dalalka Jabuuti, Kenya, Itoobiya, Uganda, Burundi iyo Nigeria oo ciidamo Boolis ah ay ka joogaan.

SHARE